Астана қаласында “Алаш заңгерлері” кітабының тұсауы кесілді
Астана қаласы, ҚР Ұлттық академиялық кітапханасында заңгер, ҚР Парламент мәжілісінің депутаты Абзал Құспанның «Алаш заңгерлері» кітабының тұсауы кесілді.
Кітапта ХХ ғасырдың басындағы қазақ заңгерлері жайында мағлұмат берілген. Олардың қысқаша өмірбаяны, қоғамда атқарған істері мен елдегі заң саласының дамуына қосқан үлестері баяндалған.
Жиында Абзал Құспан «Алаш заңгерлері» дегенде былайша түсінік береді:
«Бұл Алашордаға, Алаш арыстарына ғана қатысты дүние емес. Алаш – қазақтың ұраны. Алаш десек – қазақ, қазақ десек – Алаш деп түсінуіміз керек. Екеуі бір ұғым. Бұл – бір. Бізде қалыптасып қалған бір дүние бар: «КСРО-ға қызмет еткен коммунистердің бәрі оңбаған, алашордалықтар мықты», – дейді. Коммунистік идеяға сеніп, сол идеологияға қызмет еткендер де сталиндік репрессия құрбаны болған жоқ па? Олардың ішінде де қазаққа жаны ашыған, Алаш идеясына адалдық танытқан тұлғалар аз болмаған. Сондықтан тек алашордалықтар ғана атылған жоқ, қып-қызыл коммунистер де атылып кетті. Олардың арасында қуғын көріп, сотталып келгендері де бар. Бұл кітапқа коммунистер де, ешқандай партияға қызмет етпеген тұлғалар да енген», – дейді.
Бұл кітап заң саласында қызмет ететін мамандарға және ХХ ғасырдың басындағы қазақ интеллигенциясы тақырыбына қызығатын қалың оқырманға арналады.
